Eskolara

 

Badator, badator... Hona hemen ikasle berriak.

 

 

Mendibuelta hura

Orain dela 10 bat urte izango zen. Lagun bat eta biok Euskal Herriko Pirineoan genbiltzan zeharkaldia egiten. Egun hartan gure asmoa Iratitik Orbaizetara mendiz joatea zen.

Goizean goiz altxatu, gure motxila handiak hartu eta bideari ekin genion. 4-5 orduko ibilaldia geneukan aurretik, bide erraza behar zuena. Eguraldia primerakoa.

Zer gertatu zen? Hasi eta berehala okerreko bidea hartu genuen, beste alderantz jo eta egun osoan zeharo galduta ibili ginen, inor aurkitu gabe, gainera. Ez dakit zenbat ordu ibiliko ginen abuztuko eguzkiaren pean azkenean hasierako lekura iristeko. Horri esker, baina, Okabe mendi zoragarria ezagutu genuen. Ez dut inon hainbeste mairu-baratze (cromlech) ikusi, denak elkarren ondoan. Azkenik Burdinkurutzeta mendatera heldu ginen, eta handik behera, Iratira berriz ere.

Hurrengo egunean inolako arazorik gabe joan ginen Orbaizetara, baina oraindik gogoan daukat ezustean Okaben izan ginenekoa.

Eta zuek, kontatuko al duzue gogoratzen duzuen ibilalditxoren bat?

Autoestopean

 

Gaur egun ez da jenderik ikusten autoestop egiten, ez dakit debekatuta dagoen, baina orain dela urte batzuk oso normala izaten zen, jaietara, unibertsitatera edo hondartzara joateko, adibidez. Ni, gazteagoa nintzenean, dexente ibili nintzen horrela eta oroitzapen politak ditut, baina esperientzia txarren bat ere bai.

Behin, Debatik Eibarrera nindoala, gizon nagusi batek hartu ninduen eta, jakina, poz-pozik sartu nintzen autoan. Berehala konturatu nintzen, ordea, mozkor-mozkor eginda zihoala. Irratian musika mexikarra zeukan topera jarrita eta bera kantuan "bibamexikoka" eta atzamarrarekin beste auto guztiei tiroka. Ez nintzen batere seguru sentitzen eta "akojonatu" egin nintzen. Mendarora heldu ginenean, gelditzeko eskatu nion mesedez, lagun bat bisitatu nahi nuela eta. Bidaia laburra, baina "emozioz" betea izan zen.

Eta zuek, autoestop egin duzue? Nolako esperientzia izan zen? Pasadizoren bat kontatuko duzue?

Zer egingo duzue aste santuan?

Aste santua ez da oso santua niretzat, baina jai egun batzuk edukiko ditut, jende askok bezala. Beraz, aste honetarako planak kontatzea proposatzen dizuet. Lan egin behar duzue ala ez? Kanpora joango zarete ala herrian geratuko zarete? Zerbait berezia egingo duzue?

Nik ez daukat aparteko planik, baina egun hauek aprobetxatzen saiatuko naiz. Lagun batzuk elkartuko gara Eibarren eta betikoa egingo dugu, txangoren bat, afari bat hemen, bazkari bat han, jan, edan eta atseden hartu, hori da dena. Ez dago gaizki, ezta?

Argazki honetan nire koadrila iazko aste santuan. Ni bigarrena naiz. 

Eta zuek, zer egingo duzue?

Serantes mendira

Kaixo, lagunok! Mendizalea naiz eta Santurtzira etorri naiz gaur Serantesera igotzeko asmotan. Esan didate oso mendi polita dela , baina ez dakit nondik joan. Lagundu, mesedez!

 

 

 

 

Inauteriak. Zer egingo duzu?

Orain dela urte batzuk koadrilako lagunak elkartzen ginen eta afaria egiten genuen denok mozorrotuta eta primeran pasatzen genuen. Orain, ezer ez. Hala ere, Eibarrera joango naiz larunbatean eta hango giroa ikusiko dut. Beti izaten dira mozorro originalak eta umore ona.

Eta zuk zer egingo duzu? Mozorrotuko zara?

Agenda

Egin ezazu klik hemen eta "Berria" egunkariko eguneko agenda aurkituko duzu. Azter ezazu ondo-ondo goitik behera eta aukera ezazu zeure gustuko edo intereseko ikuskizuna. Gero, bidali komentarioa, mesedez.

1. Nora zoaz gaur?

Markinako Uhagon Kulturgunera.

2. Zein ikuskizun dago hor?

Txinari buruzko diaporama.

3. Zergatik aukeratu duzu?

Gaia interesgarria delako. Txinara joateko asmoa dudalako.

Txoria txori

Egin ezazu klik hemen eta "musikazblai.com" izeneko atarian sartuko zara. Hor Mikel Laboaren kantagintzari buruzko informazioa aurkituko duzu: diskoen portada ederrak, Laboaren argazkia zuri-beltzean, abesti batzuen tituluak, hitzak, itzulpenak eta komentarioak. Komentarioen kopuruari begiratuta, argi dago "Txoria, txori" dela kantarik famatuena eta arrakastatsuena.

Irakur itzazu komentario horiek (penintsulako ia hizkuntza guztietan daude idatzita) eta anima zaitez zu ere zeure komentarioa idatzi eta bidaltzera (gure blogera eta, nahi baduzu, musikazblaira). Oharra: Ahal baduzu, komentarioa euskaraz idatzi.

Aizu, futbol zelaira joan nahi dut

Santurtzira etorri naiz mandatu batzuk egitera eta ez dut herria ezagutzen. Laguntza behar dut hurrengo lekuetara joateko:

- Futbol zelaira

- Bullonera

- SKA-ra

- Temas liburudendara

- Zaharren egoitzara

-...

Euskaltegiaren atearen aurrean nago. Lagundu, mesedez.

Letra-zopan 13 aditz topatu! "Start" klikatu eta hasi!

Ikasle garaiak

Ni oso ikasle formala nintzen txikitan. Egia esan, irakasleak oso gogorrak ziren eta haien beldur ginen.

"Salto"handia izan zen institutura joatea. Han beste mundu bat ezagutu nuen: askatasuna, neskak, parrandak, grebak... Nire notak asko jaitsi ziren, baina, nola edo hala (asko kopiatzen nuen), beti gainditzen nuen.

Pasadizo bat kontatuko dizuet: oso talde bihurria ginen, eta behin, ikasgelan futbolean jolasten, kristalera handi bat apurtu genuen. Negua zen eta hotz handia sartzen zen. Irakasleek, zigor modura, kristala ez ipintzea erabaki zuten, baina gu ez ginen atzean geratu eta greba egin genuen kristala konpondu arte. Bi edo hiru egun pasatu genituen horrela, baina azkenean kristala ipini zuten.

Eta zu, nolako ikaslea zinen? Kontatuko al duzu pasadizo txiki bat?

Elurra bisitari

Larunbat goizean 10etan altxatu nintzen eta sorpresa handia hartu nuen leihotik begiratu nuenean: teilatuak, autoak, berdeguneak... zuri-zuri. Elurra Santurtzin!

Autobusa hartu eta Eibarrera joan nintzen, lagunekin bazkaria nuen eta. Beti hartzen dut egunkaria autobusean irakurtzeko, baina larunbatean ez nuen erosi, paisajea ondo-ondo ikusi nahi nuen. Benetan polita zegoen Bizkaia osoa zuriz jantzita. Beti gustatu zait elurra egitea, egunari giro berezia ematen dio.

Gustuko badituzu, hemen dituzu larunbateko argazki eder batzuk.

Eta zuri, elurra gustatzen zaizu? Zerbait berezia egin zenuen larunbatean?

Patxi Altunaren biografia

Urtarrilaren 20an, San Sebastian egunean, Patxi Altuna euskaltzale eta irakaslea hil zen, Azpeitian , bere jaioterrian.

Hemen Patxi Altunaren biografia aurkituko duzu, bost kapitulutan banatuta. Irakur ezazu lehenengo kapituluko lehenengo atala ("Patxiren haurtzaroa herrian") eta erantzun sei galdera hauei:

1. Zein egunetan jaio zen Patxi Altuna?

2. Zein ogibide zuten Patxiren gurasoek?

3. Nor zen Patxi kanpaxa ?

4. Norena zen Patxiren etxe azpiko denda?

5. Nola hil zen Patxiren anaia gaztea?

6. Zein egunetan egiten da azoka Azpeitian?

Erantzunak aurkitzen dituzunean idatzi zure komentarioa eta bidali.

Nahi baduzu, irakur ezazu biografiaren bigarren ataltxoa eta egin ezazu galdera bat

Zure filma

 

Hemen duzue kontsigna:

 

Azken egunetan klasean egin dugun bezala, gustuko duzuen film baten aurkezpen txikia egitea proposatzen dizuet.

 

Adibide gisa, nirea duzue hemen: 

 

Fallen

Thriller amerikar honetan Denzel Washington aktorea dugu hilketa misteriotsuak argitu nahi dituen detektibea. Behin eta berriz aurkituko du ustezko hiltzailea, baina benetakoa ez da gure mundukoa. Film honetako beste protagonista bat Rolling Stones taldearen "Time is on my side" kanta famatua da. Adi pantailari entzuten duzuenean.